Доколку сакате да се ослободите од вишокот килограми, а не го сакате вежбањето во теретана, решението ви е пред носот- брзо одење! Брзото одење, меѓу другото е наједноставниот начин за да ја одржите физичката кондиција, тонусот на мускулите и витката линија!

Освен тоа, брзото одење го зголемува капацитет на белите дробови, го зајакнува срцевиот мускул, го стабилизира крвниот притисок, позитивно влијае врз циркулацијата на крвта, дигестивните и дишните органи, придонесува за поголема потрошувачка на калории , а со тоа и го согорува вишокот на масни наслаги, штити од остеопороза, ја намалува психичката напнатост и го намалува влијанието на стресот на кој сите ние сме секојдневно изложени.

Брзото одење е идеална спортска активност за сите – без оглед на возраста и моменталната физичка кондиција.

За разлика од трчањето, брзото одење значително помалку влијае врз зглобовите, што го прави особено погодно за повозрасните, а им се препорачува на сите оние кои поради ризиците за здравјето, не може да се вклучат во други спортови (тоа се оние луѓе со кардиоваскуларни и белодробни заболувања, дебели луѓе, оние кои кои страдаат од висок крвен притисок , остеопороза или артритис) .

Им се препорачува и на лицата, кои, од која било причина , помалку се движат (на пример, оние кои на работното место воглавно седат или стојат) , како и оние кои престојуваат воглавно во затворен простор во текот на денот.

За постигнување на оптимален ефект, најдобро би било да применувате брзо одење три до четири пати неделно во траење од 40 до 60 минути со брзо темпо, односно постепено да го забрзувате темпото од пет на седум км / час. Ритамот на одење мора да бидат таков што ќе ви забрза пулсот и бројот на вдишувања, но не и толку силен за да останете без здив.

Започнете со побавно темпо, изберете куса стаза, а секој ден, според сопствените способности забрзајте го темпото и времетраењето на вежбањето. Не заборавајте во текот на одењето да ги контролирате срцевите отчукувања, за да бидете сигурни дека вежбате со оптимален интензитет.

Одењето со брзина при која срцето работи со 65 до 75 проценти од максималната брзина,е најдобра за согорување на вишокот на масни наслаги.

Максималната брзина на срцето можете лесно може да ја измерите :

220 отчукувања во минута минус вашите години = вашиот максимален број на срцеви отчукувања .

Пресметајте колку е 65-75 проценти од добиената вредност и одржувајте го бројот на отчукувањата на срцето на таа вредност.

Додека одите, обрнете внимание на правилното држење на телото. Торзото треба да биде исправено, грбот рамен , рамената опуштени, а стомакот и задникот вовлечени. Рацете треба да бидат свиткани во лактите во агол од 90 степени и ритмички да се движат заедно со телото . Гледајте право пред себе , а не во подот и внимавајте на вашето дишење, кое треба да биде избалансирано, усогласено со темпото на одење.

Доколку сте во можност, за рекреација изберете патека во природа. Изберете спортска облека изработена од природни материјали, во која ќе ви биде угодно и ќе бидете во можност слободно да се движите, како и удобни обувки прилагодени за брзо одење.

Пред и после тренингот, задолжително истегнете ги мускулите за да ги спречите евентуалните повреди и да ја зголемите флексибилноста . За време на вежбањето, пијте многу течности (по можност негазирана вода), за да ја спречите дехидрацијата на организмот.