Склековите се типичен пример за инстант вежба. Тие не се вежби за кои треба да одите специјално во теретана или за која ви треба посебна опрема. Единствено што се троши кај склековите се калориите. Како вежба, склековите им одолеваат на трендовите, а притоа се користи тежината на телото и гравитациската сила за да се зајакнат мускулите. Тие влијаат на мускулите на градите и надворешните страни на надлактиците, кои стануваат посилни и подефинирани. Освен мускулите на градите, ќе ги зајакнете и рацете и мускулите на рамената. Ако го разгледаме начинот на кој е телото поставено при правилно изведување склекови, ќе забележиме дека се активираат и мускулите на грбот и стомакот – абдоминалните мускули се оние кои го држат телото во правилна положба и кои му даваат поткрeпа na рбетот.

Кај основната варијанта на склековите дланките се наоѓаат наместени под рамената, додека нозете се во ширина на колковите. За еден склек да може да биде правилно направен, треба да се внимава за време на изведувањето целото тело да се наоѓа во рамна положба. Телото треба да биде значи во рамна линија од врвот на главата, па се до стапалата, а за време на спуштањето и подигањето колковите не смеат да паѓаат кон подот. Додека се спуштате, немојте да се спуштате сосема до подот: телото нека остане неколку сантиметри подигнато од подот. Сето ова ги јакне коските и зглобовите, што е одлично за телото кое со текот на стареењето станува се послабо и покревко, посебно кога се знае дека ја згуснува густината на коските, што е вистинска превентива од остеопорозата.

Склековите можат да помогнат и кај слабеењето. Иако тешко ќе загубите поголема количина килограми благодарение само на правењето склекови, тие сепак придонесуваат за слабеење. Го забрзуваат базалниот метаболизам, што значи дека ќе имате зголемена потрошуваќка во текот на целиот ден.

Ако не сте во форма, правењето склекови не е ни малку лесна вежба. Затоа можете да започнете со т.н. женски склекови, при чие изведување колената се наоѓаат на подот. Притоа повторно мора да внимавате рамената и колковите да ви бидат парелелно поставени, а абдоминалните мускули да бидат притоа активирани. Откако ќе ги совладате овие женски склекови и ќе се се зајакнете, можете да почнете да правите склекови каде колената не се попираат повеќе на подот.

Како што ќе продолжите да се зајакнувате, така ќе се менува и рутината на вежбањето: склековите многу лесно можете да ги отежнете. Една од потешките варијанти е да ги подигнете нозете на клупа или на голема топка и да правите склекови од таа положба. Тоа дополнително ќе ја засили работата на мускулите на горниот дел од телото, но оваа варијанта можете да ја започнете само откако ќе ја совладате основната варијанта. Можете да правите склекови и само со една рака. Оваа варијанта не само што ќе ви даде сила, туку ќе бара од вас да имате и добро чувство за рамнотежа, па ќе морате да бидете особено внимателни при нејзиното изведување.

Проверка во огледало

Кога започнувате да вежбате склекови, замолете некого да провери дали телото ви е цело време во рамна линија. Доколку тоа не е можно, правете ги склековите покрај огледало и самите проверете дали ви пропаѓаат колковите за време на нивното изведување.

Вљубеничка во здравата исхрана и науката, сака да чита литература од разни жанрови и обожава медицина