4 вежби против спондилоза

Окоскенувањето на рбетот или спондилозата е една од најчестите здравствени проблеми на современото доба. Дегенеративните промени меѓу пршлените во најголема мерка се условени од генетиката, но ги забрзуваат и недоволната физичка активност, лошото држење на телото, професиите кои бараат долготрајно седење и принудните положби, одморањето во неправилна положба и прекумерната телесна тежина.

Спондилозата може да го зафати кој било дел од рбетниот столб, но најчесто се работи за болки и вкочанетост во вратот и во рамено-лопатичниот појас и долниот дел на грбот, односно цервикален и лумбален синдром. Симптоми како што се поттилна главоболка, вртоглавици, болкии трпнење во рацете и нозете, слабост во мускулите и намалено чувство на допир се сериозни знаци, поради кои треба да се побара веднаш лекарска помош.

За да се спречи појавата на овие симптоми и окоскенувањето меѓу пршлените, важно е да се зајакне мускулатурата. Ова се само неколку вежби кои се користат во спречување на појавата и понатамошниот развој на спондилозата.

“ОТВОРАЊЕ” НА КОЛЕНАТА

Рацете испружете ги покрај телото, а нозете свиткајте ги. Полека подигајте ја главата, а потоа и вратот и горниот дел од лопатките, додека истовремено со рацете ќе ги ширите колената, така што со дланките ќе ги потиснувате од внатрешната страна, а отпор ќе давате со колената. Задржете ја положбата со подигната глава и лопатки, а отпор давајте со колената пет секунди. Повторете ја вежбата 10 пати.

НОГА – РАКА

Заземете положба ,,на сите четири,,. Дланките треба да ви бидат поставени така што да одговараат со ширината на рамењата. Насочете го погледот кон просторот помеѓу дланките. Подигнете ги истовремено спротивната рака и нога, но само толку да останат во линија со трупот. Задржете ја оваа положба пет секунди. Спуштете ги ногата и раката во почетната положба, па повторете со другата рака и нога. Повторете ја вежбата по 5 пати на секоја страна.

ПРАВЕЊЕ ОТПОР

Легнете на грб, свиткајте ги колената под агол од 90 степени, стиснете ги дланките во тупаници. Затегнувајте ги стомачните мускули, додека со долниот дел од грбот притискате кон подлогата. Додека издишувате, задржете ја контракцијата на мускулите пет секунди. Повторете ја вежбата 10 пати, со паузи од по десет секунди.

ПЛАНК ВО ПАРАЛЕЛА

Легнете на стомак, потпирајќи се со подлактите. Кревајте го телото од подот, затегнувајќи ги грбните мускули, стомачните мускули и оние на карлицата. Подигнете се на врвовите од прстите. Главата, рбетниот столб и нозете треба да ви бидат паралелни. Задржете се во оваа положба пет секунди. Повторете ја вежбата по 10 пати, со паузи од по десет секунди.