Болка во вратот, вкочанет врат се синоними за една од најчестите болки. Повеќето причини за болка во вратот се безопасни. Мускулите кои се наоѓаат во вратниот дел можат да се истегнат поради лошо држење на вратот при долго работење на компјутер, варосување на таванот или други потешки активности изведувани во наведната положба. Ако не се третираат болките во вратот, по извесно време ќе се појават ,,грутчиња,, т.н. миогелози . Можеби ќе си речете кому му е потребен силен врат, но размислете уште еднаш. Вратот носи значителна тежина – вашата глава и е поврзан со рбетот.

Сето свое време го минуваме секогаш малку наведнати нанапред, посебно кога сме на компјутер. Притоа вратот се криви, неправилното држење доведува до главоболки и до несоодветно држење на телото. Постојат неколку вежби за врат, а во продолжение ви ги претставуваме трите најефикасни.

Подготовка

Како и кај сите други вежби, така и овде потребно е прво загревање. Застанете исправено и опуштете ги рамењата. Главата навалете ја во лево, па опфатете ја со левата рака и движете ја кон левото рамо. Останете во таа положба 20 секунди, со лесно притискање на главата кон рамото. Повторете го истото и со десната страна и со другата рака.

Изометриска вежба за врат бр. 1

Застанете исправено, со погледот насочен рамно пред себе и со опуштени рамења. Спојте ги дланките и ставете ги на чело. Со главата туркајте на дланките, но држете ги за цело време цврсто, не дозволувајќи и на главата да се помести – само вршете притисок – како да се обидувате да ,,одите со глава низ ѕид,,. Ова е вежба за задните мускули на вратот.

Потоа ставете ги дланките на тилот и обидувајте се да ја турнете главата наназад, но цврсто застанете ја со рацете. Ова е вежба за предните мускули на вратот. Повторувајте ги двете вежби се додека не се уморите.

Изометриска вежба за врат бр. 2

Застанете во положба како за првата вежба. Подигнете ја десната рака и ставете ја дланката на десната страна на главата, преку увото. Вршете притисок на дланката туркајќи со главата, но повторно без да и дозволите на главата да се помести – цврсто држете ја раката. Повторете го истото и со другата страна и повторувајте ја оваа вежба додека не се уморите.

Вежба на клупа

Легнете на клупа со лицето свртени кон долу – рамењата и дел од телото нека ви висат од страните на клупата. Ставете ги рацете зад глава и вдишете, па подигнувајте го горниот дел од телото извивајќи ја притоа лесно и главата. Кога ќе издишувате спуштајте се кон клупата (со горниот дел од телото) и опуштете се. Повторете неколку пати.

Свртете се и легнете на грб на клупата. Главата и вратот нека висат од работ на клупата. Вдишете и оставете главата и вратот да ,, паднат,, преку работ на клупата. Устата држете ја лесно отворена. Вдишете и подигнете ги главата и вратот паралелно со клупата – и телото нека ви биде паралелно поставено. Фокусирајте се на мускулите на вратот и повторувајте ја вежбата.

Сунѓерест ваљак (видео)

Вљубеничка во здравата исхрана и науката, сака да чита литература од разни жанрови и обожава медицина