Зацврстете го телото со само 5 вежби на ден

Сте забележале дека ви се појавило стомаче? Не е ни чудо. Опуштањето во омилените јадења и слабото движење си го направиле своето – мускулите се опуштиле, посебно оние на стомакот, половината и задникот. Затоа е време да почнете со вежби за јакнење на мускулите и истегнување. Овој тренинг правете го секој ден. Нема да ви одземе многу време, а резултатите ќе ги забележите веќе по неколку недели. Сите овие вежби ги активираат мускулите на целото тело, стомакот, грбот, нозете и задникот.

Вежба 1

Ги активира мускулите на долниот дел на грбот, стомакот, колковите и задникот.

Легнете на грб. Свиткајте ги колената, стапалата поставете ги паралелно на подот, а рацете испружете ги покрај телото, со дланките свртени кон подот. Затегнете ги мускулите на задникот и подигнете ги колковите од подот, така што рамењата, колковите и колената да бидат во една рамнина. Опуштете го долниот дел од телото и внимавајте вратот да не биде премногу оптоварен. Задржете се во оваа положба 1 минута. Спуштете ги колковите малку кон подот и опуштете ги мускулите на задникот. Продолжете да ги кревате и спуштате колковите 20 до 30 пати. Направете 2 до 3 повторувања.

Вежба 2

Ги активира мускулите на на стомакот, горниот дел на грбот и нозете.

Легнете на грб. Рацете ставете ги зад главата, а нозете малку подигнете ги. Заротирајте ги рамењата во лево и во исто време подигнете ја десната нога кон десниот лакт. И двете нозе треба да ви бидат во воздух, како и главата, вратот и рамењата. Левата нога целосно испружете ја. Продолжете да ги менувате страните на 1 минута, а потоа вратете се во почетната положба. Направете 2 до 3 повторувања.

Вежба 3

Ги активира мускулите на грбот, трупот, колковите, нозете и задникот.

Легнете на грб. Свиткајте ги колената, а рацете испружете ги покрај телото, со дланките свртени кон подот. Затегнете ги мускулите на задникот и подигнете ги колковите, така што да дојдат во рамнина со рамењата и колената. Во исто време внимателно подигнете ја едната нога, така што стапалото да биде насочено кон таванот. Дланките за сето време треба да бидат на подот. Задржете се во оваа положба 30 секунди. Вратете ги колковите кон подот и опуштете ги мускулите на задникот. Продолжете да го кревате и спуштате задникот 15 до 20 пати. Истото повторете го на другата страма. Направете 2 до 3 повторувања на секоја страна.

Вежба 4

Ги активира мускулите на грбот, стомакот, колковите, половината, нозете, задникот, рацете и рамењата.

Ставете ги дланките на под, така што да бидат во линија со рамењата, а рацете се целосно испружени. Потпирајте се на стапалата, така што телото да ви биде целосно рамно. Затегнете ги мускулите на стомакот и задржете се во оваа положба 30 до 60 секунди, а потоа спуштете се. Направете 2 до 3 повторувања.

Вежба 5

Ги активира мускулите на стомакот, колковите и задникот.

Рацете ставете ги на колковите и со левата нога исчекорете наназад. Спуштете се во исчекор и внимавајте коленото да не ја помине линијата на стапалата. Спуштете го левото колено колку можете најмногу. Задржете се во таа положба 30 секунди, а потоа полека спуштајте се и кревајте се 20 до 30 пати. Повторете го истото на другата страна. Направете 2 до 3 повторувања на секоја страна.