Вежбањето е здрава навика, и веќе одамна се напишани многу текстови за бројните предности на физичката активност. Сепак, во периодот на менструалниот циклус кај жените, телото им сигнализира дека настанале некои промени, и затоа на различен начин се однесуваат кон вежбањето во текот на тој период.

 

Затоа се поставува прашањето: “Дали е добро да се вежба за време на циклусот или треба да се одмарате во првите неколку денови од циклусот?” Дали е навистина потребно да му давате значење на овој период или треба да тренирате со ист интензитет како и во другите денови од месецот? Каков вид на вежбање се препорачува во периодот на месечниот циклус?

 

Додека некои од жените имаат период на менструација, без поплаки, другите пак, чувствуваат замор, недостаток на енергија, главоболки, напнатост и други останати промени што ги спречуваат во извршувањето на секојдневните активности без конзумирање на лекови против болки или одмарање некое време.

 

Затоа, одговорите на горенаведените прашања се различни и зависат од жена до жена, бидејќи секоја е различна, па деновите на менструација ги чувствува на еден поинаков начин.

 

Универзалното правило е дека треба да се слуша сопственото тело и да постапите во согласност со моменталната состојба на организмот. Значи, ако се чувствувате дека вежбањето ќе му помогне на телото да се справи со менструацијата, тогаш вежбајте но без поголем напор, но ако вашето тело ви сигнализира дека ви треба одмор, не го игнорирајте тоа.

 

Најновите истражувања покажуваат дека вежбањето ги олеснува симптомите на менструацијата.

 

Истражувањето од страна на турските научници за влијанието на менструацијата на физичката кондиција вклучува 241 врвна спортистка и покажа дека речиси три од четири се чувствуваат многу полошо. Сепак, 63 проценти од анкетираните велат дека болката се намалува за време на тренингот и натпреваувањата,  додека 62,2 проценти изјавиле дека имаат подеднакво добри резултати во вежбањето за време на крварењето, како и во другите денови од месецот.

 

Друга студија, од Универзитетот во Западна Вирџинија, покажала дека атлетичарките подеднакво добро трчаат за време на првата и втората половина од менструалниот циклус. Сепак, проблемот се јавува кај оние кои имаат сериозни предменструални и менструални симптоми како што се тешки грчеви и тешко крварење.

 

Француската студија за жените кои ги имале овие симптоми покажала дека тие тогаш имале полоши спортски резултати.

 

Истражувањето од 2010 година покажало дека на жените не им се нарушил распоредот за тренинг за време на менструалниот циклус, без разлика дали земале контрацептивни пилули или не. „Откривме дека жените без разлика на фазата на менструалниот циклус и понатаму го задржале нивното ниво на тренирање“ вели Chrisalbeth J. Guillermo, истражувач на Универзитетот во Невада, Лас Вегас.

 

 

vezbanje_ciklus_1

 

 

Вежбањето ги намалува симптомите на ПМС

 

Факт е дека редовното вежбање помага да се чувствувате подобро, пред и за време на менструацијата. Предменструалениот синдром познат како ПМС обично вклучува физички и психолошки симптоми кои кај жените се јавуваат околу 7-10 дена пред периодот и обично предизвикуваат симптоми како замор и депресија.

 

Според  американскиот Конгрес и гинеколозите, аеробното вежбање, кое вклучува активности како што се брзо одење, трчање, возење велосипед и пливање може да ги ублажи симптомите на ПМС.

 

Вежбањето може да ги ублажи менструалните грчеви.

 

За време на вежбањето се зголемува циркулацијата на крвта, се намалува надуеноста, и благодарение на ослободувањето на хормонот ендорфин (кој го намалува нивото на чувствителност на болка) и серотонинот, сигурно ќе имате подобро расположение.

 

Иако не постојат цврсти докази дека со вежбањето може да се ублажат силните менструални грчеви, сепак поголемиот дел од поединечни испитувања покажале дека вежбањето ги намалува менструалните болки.

 

Јогата и менструацијата

 

Според класичната јога подобро е да бидете неактиви за време на месечниот циклус. Секако не се препорачува вежбање барем во првите два дена на менструацијата, што сепак е индивидуално.

 

Повеќето центри за јога се согласуваат дека за време на менструацијата не може да се врши инверзија – превртени пози во кои ногата се наоѓа над нивото на срцето. Причината за тоа е што при инверзијата, гравитацијата неприродно делува на матката, ја зголемува циркулацијата и може да доведе до зголемување на крварењето.

 

Значи треба да се избегнуваат позициите како што се: Стој на раменици (Salamba Sarvangasana), и Стој на глава (Shirshasana), а има и јога позиции како што се: Мачка (Marjaryasana), Кобра (Bhujangasana), Риба (Matsyasana), Лак (Dhanurasana ) и многу други кои го релаксираат телото и ги намалуваат менструалните болки и напнатоста.

 

На крај: Каков вид на тренинг да се одбере?

 

Заклучокот е дека било каков вид на тренинг е добар за време на вашиот период, доколку се чувствувате добро и вашето тело реагира позитивно на вежбањето. Се што е умерено е препорачливо, без разлика дали се работи за лесно трчање, аеробик, умерен тренинг на телото, пливање, пилатес, јога (освен инверзија), протегнување итн. Од друга страна, пак, интензивното вежбање што доведува до преголем напор не се препорачува во текот на овој период.

 

Разменувајќи искуства со жените од различни возрасти и нивоа на тренирање, може да се заклучи дека нивните ставови се обично позитивни кога станува збор за вежбањето за време на периодот.

 

Повеќето од нив тврдат дека редовното вежбање им помага во намалувањето на предменструалната напнатост, болката, тешкото крварење и дека се чувствуваат подобро после тренингот.

 

Иако во периодот на менструацијата, многу жени се замислуваат себе си дека лежат на каучот со многу храна околу себе, умереното вежбање сигурно ќе влијае позитивно.

 

Затоа, редовно вежбајте пред и после менструација за да можете оние “денови од месецот” да ги надминете што полесно, како и да го слушате  телото за време на менструацијата и да дејствувате во согласност со тоа што го чувствувате индивидуално во моментот.