Ублажете го ишијасот со вежбање

Силната и остра болка во долниот дел од грбот и нозете, која настанува како последица од ишијасот, освен со масажи и физикална терапија може да се ублажи и со вежби дома. Со лесен тренинг треба да се започне веднаш штом ќе попуштат болките. Најдобро е да се започне со вежби за истегнување на грбот, а потоа продолжете со оние за јакнење на стомачната и грбната мускулатура. Овие неколку вежби можат да ви помогнат да ги намалите здрвеноста и болката, како и чувството на трнење, кое често се јавува долж ногата.

Вежба 1

Легнете на грб, стапалото од левата нога ставете го на десното колено. Со рацете фатете ја десната надколеница малку над коленото и влечете го полека кон градите. Задржете во таа положба 30 секунди. Повторете го истото со другата нога.

Вежба 2

Заземете неутрална положба додека лежите на грб. При вдишување свиткајте го рбетот во положба на лак и тргнете напред, задржете и вратете се во почетната положба, така што долниот дел на грбот и карлицата да бидат ,,залепени,, за подот. Во секоја положба задржувајте се по 5 секунди.

Вежба 3

Легнете на грб со раширени раце и нозе свиткани во колената. Споените нозе прво навалете ги во десно, потоа вратете ги во почетната положба, па потоа навалете ги во левата страна.

Вежба 4

Од лежечка положба подигнете го горниот дел на телото, потпирајќи се со лактите и подлактите на подот. Задржете се во оваа положба се додека не ви стане непријатно во неа, а потоа спуштете се повторно во почетната положба.

Вежба 5

Легнете на грб, со нозете свиткани во колената и колковите. Рацете испружете ги покрај телото. Поткренете ги главата и рамењата од подлогата, а потоа со прстите допрете ги колената, затегнете ги стапалата и притиснете го рбетот на подлогата. Задржете неколку секунди и вратете се во почетната положба.

Вежба 6

Од клекната положба подигнете ги левата нога и десната рака. Вратете се во почетната положба и повторете го истото со другата рака и нога.

Вежба 7

Од клекната состојба кревајте се полека нагоре, се додека рацете и нозете не ви бидта сосема испружени. Главата останува меѓу рацете. Останете во таа положба неколку секунди, а потоа повторете ја вежбата неколку пати.

Вежба 8

Седејќи на стол или на пилатес топка, наведнете се колку што можете повеќе, со опуштени раце поставени помеѓу раширените колена. Потоа исправете се полека.