Семките од лубеницата чуда прават

Речиси да не постои човек кој не сака во лето да се разлади со овој деликатес. Но, колку всушност знаете за нејзините семки? Луѓето најчесто ги фрлааат и го јадат само месото на лубеницата, а научниците тврдат дека тие се многу здрави за нашиот организам.

Истражувањата велат дека семките на лубеницата се одлични за дигестивниот систем. Тие содржат влакна кои се борат против воспаленија и кои го подобруваат варењето. Како природни диуретици, помагаат при проблеми со камен во бубрег, како и кај уринарни проблеми. Во себе содржат, исто така, цитрулин, кој има антиоксидативни својства. Веќе знаеме дека антиоксидансите се борат против оштетувањата на клетките во нашиот организам и дека се многу важни како превентива за различни болести, посебно за канцер.

Исто така, содржат во себе незаситени и полизаситени масти, кои помагаат во намалувањето на нивото на лошиот холестерол во крвта. Тоа значи дека тие всушност помагаат во спречувањето на срцевите заболувања и на мозочниот удар. Добар начин да се искористат сите потенцијали на овие семки е да се варат околу 45 минути, а потоа таа течност треба да се испие. Уште еден друг рецепт е да се испечат во рерна 15-тина минути, на температура од 160 степени Целзиусови. Ако ви се допаѓа нивниот вкус, можете да им додадете сол и маслиново масло. Тие уште се богати и со железо, фолна киселина и магнезиум. А од калории, во 30 грама (400 семки) има само 158 калории.

Затоа, ова лето грицкајте семки од лубеница и бидете здрави!