Тајната на успешната фитнес исхрана е и во соодветната исхрана, бидејќи на мускулите им е потребна енергија за да можат да вежбаат, а неа ја добиваме од храната.

Зголемената физичка активност треба да се усклади со моменталниот здравствен статус и со стварните можности. Ако постепено се зголемува интензитетот на оптоварување и му се дозволи на организмот прилагодување на активностите, изгледите за поволен ефект се поголеми, а вежбањето е попријатно. Планираното вежбање не смее да ги попречува секојдневните активности, да ја намали работоспособноста и да доведе до исцрпеност. Инструкторите предлагаат вежбање кое ќе ги мобилизира мускулите, со нагласок на мускулната група која кај рекреативците е ,,голем,, проблем. Така, жените позасилено ги вежбаат мускулите на нозете, мажите – на грбот и на абдоменот. Целта е зголемување на мускулната маса, намалување на масните наслаги и подобар тонус на мускулите.

Планирање на исхраната

Тајната на успешната и квалитетна фитнес програма лежи во соодветната исхрана. За вежбање, на мускулите им е потребна енергија. Јагленохидратите се основен извор на енергија, па планирањето за нивно консумирање е предуслов за оптимално вежбање. Пожелно е да се консумира овошје, интегрален леб, разни јадења од мешунки (грав и слично), млеко, јогурт, интегрален ориз, тестенини… се со цел за одредена телесна активност да имате доволно енергија. И зеленчукот е исто така добар извор на минерали, има мала енергетска вредност, но дава чувство на ситост. Со салати, тиквички, блитва, грашок ги внесуваме и пожелните количини на диетални влакна. Млекото и млечните производи даваат калциум, протеини и освежуваат, па голем број рекреативци и спортисти со апетит го консумираат.

Мастите за рекреативците кои се вклучени во програми за вежбање се предмет на расправа и се предвидуваат во многу мали количини во исхраната, но не е препорачливо и целосно да се исфрлат од исхраната. Месото, рибата и јајцата и нивните преработки најдобро е да се подготвуваат на диетални начини (не пржени или похувани) со избор на сировини кои содржат помалку маснотии. Секако треба да се одбегнуваат колачи, гликоза (бонбони), пржени јадења и кандирано овошје.

Во првите недели од вежбањето треба редовно да се планира исхрана со доволно протеини (оптимално е околу11,5 грама на килограм телесна маса). Со оглед на тоа што количината на јагленохидрати влијае директно на должината на едно квалитетно вежбање, организмот треба да се снабди со јагленохидрати пред вежбањето и по вежбањето, а по престанок на активноста се подготвуваме за следната активност.

За сите оние кои се занимаваат со фитнес, подеднакво е важно да пијат доволно и често течности. Водата е важна за квалитетот на вежбањето, за размена на материите, одржување на телесната температура, отстранување на метаболичките штетни производи. Водата придонесува за поквалитетно и посигурно вежбање. Оние кои се во состојба на дехидрираност се посклони на повреди.
Рекреативците можат покрај вода да пијат и по желба: минерална вода, ароматизирана изворска вода, чај (леден и топол), сокови, компот, млеко… Температурата на пијалокот зависи од личниот афинитет.
Ако ја намалите телесната маса, треба да се земаат напитоци кои не се засладени. Задолжително сметајте и на енергетската вредност на овие напитоци. Во текот на денот препорачливо е внесување на 8 чаши вода, но оваа препорака се однесува на оние кои немаат засилени активности. Ако вежбате, треба да се зголеми оваа количина на вода и истата да се прилагоди на оптоварувањето и условите на вежбање (температурата, влажноста на воздухот).

 

Вљубеничка во здравата исхрана и науката, сака да чита литература од разни жанрови и обожава медицина