Домашни препарати за нега на кожата според типот

Препарати за масна кожа

Египетска маска

Потребно:

– 1 јајце

– 1 лажица маслиново масло

– 1 лажица млеко

– пола лажичка сол

– 1 лажица брашно.

Во стаклен сад измешајте ги јајцето, млекото и маслиновото масло. Во смесата полека додавајте ги брашното и солта. Во вака добиената смеса можете да додадете неколку капки масло од рози. Нанесете ја маската на лицето и вратот, одбегнувајќи го пределот околу очите, и оставете да стои 15 – 20 минути. Измијте ја со млака вода и потоа нанесете хидратантна крема. Оваа маска ги стеснува порите, ја чисти и храни кожата. Постапката можете да ја повторите еднаш до двапати неделно, со цел да ја одржувате кожата здрава и сјајна.

Маска од прополис

Потребно:
– 60 мл. слатка павлака
– 5 гр. прополис во прав
Измешајте ги состојките и оставете да отстои еден час. Потоа загрејте ја малку, тргнете ја од оган, додајте 10мл. сок од лимон, и оставете ја да олади. Нанесете ја на лицето и вратот и оставете ја да се исупи. Исушена отстранете ја со млака вода.
Маска од јаболки

Потребно:

• 2 – 3 средно големи јаболки
• 1 лажица мед

Јаболките излупете ги и ситно нарендајте ги. Додајте им една лажица мед и добро промешајте. Вака подготвената смеса нанесете ја на вратот и лицето. Оставете да делува 20 минути и за тоа време одморајте. Отстранете ја со млака вода.

Препарати за нормална кожа

Грчка маска

Потребно:

• 1 компир
• млеко по потреба
• 1 жолчка

  Згмечете еден сварен компир и растворете го со малку млеко (слично на пире) и додадете ја жолчка. Додадете малку вода и загрејте ја на ниска температура. Топлата смеса нанесете ја на лицето и вратот, прекријте со платнена крпа или газа. По 20 минути измијте ја маската со топла вода, потоа со студена вода. Оваа маска ја оживува кожата и ја прави еластична.

Маска од краставици

Потребно:

• 1 краставица

  На претходно добро исчистено лице ставете кора од излупена краставица, исечена на долги ленти. Лентите треба добро да се втиснат на кожата на лицето и потоа лицето треба да се покрие со крпа. Оставете да стои 20 минути. Никако не ја измивајте. Ова е освежителна маска која ја храни и освежува кожата и може да се применува колку што сакате пати.

Препарати за сува кожа

Маслиново масло и жолчка

Потребно:

• 50 гр. ливадски мед
• 1 лажица маслиново масло
• 1 жолчка

  – 35 гр. млеко во прав

  Во сад измешајте ги медот, маслиновото масло и жолчката. На крајот додадете го млекото во прав и убаво промешајте ги. Нанесете ја оваа маса на лицето и вратот и ставете газа преку неа. Оставете да отстои 30 минути. Оваа маска влијае на регенерацијата на кожното ткиво и на тој начин го подмладува кожниот епител

Маслиново масло и лимон
Потребно:

• 2 лажици маслиново масло

• 1 лажица сок од лимон

Добро промешајте ги сите состојки. Вака подготвениот ,,лек,, чувајте го во затворено шишенце и употребувајте го по секое миење на лицето.